ameer-minai

Gale Mein Hath The Shab Us Pari Se Rahen Thin

gale men haath the shab us pari se rahen thiin

sahar hui to vo ankhen na vo nigahen thiin

nikal ke chehre pe maidan saaf khat ne kiya

kabhi ye shahr tha aisa ki band rahen thiin

firaq men tire ashiq ko ja ke kal dekha

ki vo to hech tha kuchh ashk the kuchh aahen thiin

bagule ab hain ki ghurbat hai gor-e-shahan par

saron pe chatr jilau men kabhi sipahen thiin

hazaron lot gae kal uthi jo vo chilman

khadang mu-e-mizha barchhiyan nigahen thiin

kiya ye shauq ne andha mujhe na sujha kuchh

vagarna rabt ki us se hazar rahen thiin

ye zoaf hai ki nikalti nahin hain ab dil se

kabhi falak se bhi unchi hamari aahen thiin

jigar men hijr ki kal chubh rahi thiin kuchh fansen

magar jo ghaur se dekha tiri nigahen thiin

pahunch gae sar-e-manzil chale jo chaal nai

unhin men pher tha dekhi hui jo rahen thiin

falak ke daur se duniya badal gai varna

jahan bane hain ye mai-khane khan-qahen thiin

ye zoaf ab hai ki hilna giran hai qadmon ko

subuk-ravi men kabhi in ko dastgahen thiin

mushaere se hasin kyuun na chhin le jaate

rubaiyan miri chu go shubh kulahen thiin

hasin zar ke hain talib ki ab hain gird-e-‘amir’

gharib ham the to ye pyaar tha na chahen thiin

More Poems

Leave a Comment