ga raha huun ḳhamushi men dard ke naghmat main
ban gaya ik sahil-e-viran ki tanha raat main
ek do sajde zara shahr-e-nigaran ki taraf
ai gham-e-hasti Thahar chalta huun tere saath main
zindagi meri tamannaon mire ḳhvabon ka ruup
phuul main huun rang main huun abr main barsat main
ik shagufta dard ik sho.alon men bujhti chandni
ajnabi shahron se laaya huun yahi saughat main
barha is sadgi par ḳhud hansi aa.i mujhe
kar raha huun kis zamane men vafa ki baat main
har ubharti lau se raushan ho gaya mera ‘zamir’
bik gaya har muskurati raushni ke haath main
Leave a Reply