fursat ek dam ki hai juun habab paani yaan
khaak ser ho kiije sair-e-zindagani yaan
ab to munh dikha apna kaash ke tu ai piiri
mil gai tiri khatir khaak men javani yaan
kya ye pairahan tan ka juun habab chamke tha
bandhi hai hava meri tu ne na-tavani yaan
vaqt-e-girya mauzun ho kyuun na aah ka misraa
rafta rafta ashk apna ban gaya fughani yaan
jan-e-man mujhe har dam tera pas-e-khatir hai
is liye main karta huun dam ki pasbani yaan
us ke tir-e-mizhgan se ho gaya jo dil chhalni
besha-e-niyastan ki ham ne khaak chhani yaan
gher tu ne jaame ka be-tarah badhaya hai
ab zamin napega daur-e-asmani yaan
aage us ki qamat ke ek din jo akda tha
khuub sa bana sidha sarv-e-bostani yaan
yaar ki gali main tu ja ke baith mat rahna
haal par mire rakhna chashm-e-mehrbani yaan
qasid-e-sarishk apni tujh se hai gharaz itni
khaae gar vahan khana piijo aa ke paani yaan
khaar se khalish rakhna ai ‘nasir’ beja hai
hai ye abla-pai vajh-e-sar-girani yaan