furqat kī shab fazā pe udāsī muhīt hai
gulzār par havā pe udāsī muhīt hai
maġhmūm māh-o-gul haiñ pareshāñ hai chāñdnī
fitrat kī har adā pe udāsī muhīt hai
taare chamak rahe haiñ par apne ḳhayāl meñ
tāroñ kī kul ziyā pe udāsī muhīt hai
aa jaao ab ḳhudā ke liye bahr-e-ittisāl
māmūra-e-vafā pe udāsī muhīt hai
‘az.har’ ko aaj dekh to lo dosto zarā
dil se sivā qabā pe udāsī muhīt hai