jannat nahin to ku-e-butan kuchh na kuchh to ho
taskin-e-dil ko apni yahan kuchh na kuchh to ho
ankhon men ashk lab pe fughan kuchh na kuchh to ho
raaz us pe dard-e-dil ka ayaan kuchh na kuchh to ho
o be-niyaz ek uchaTti hui nazar
dil ko bhi zindagi ka guman kuchh na kuchh to ho
chashm-e-karam nahin na sahi zahr hi sahi
lekin ilaj-e-dard-e-nihan kuchh na kuchh to ho
ehsas-e-zindagi ke liye is jahan men
fikr-e-jahan ki ishq-e-butan kuchh na kuchh to ho
kuchh dil ki dhaḌkanon ka mudava bhi chahiye
dast-e-subuk ki sang-e-giran kuchh na kuchh to ho
ai ‘shauq’ be-sabab to ghazal-ḳhvaniyan nahin
tum bhi qatil-e-chashm-e-butan kuchh na kuchh to ho
Leave a Reply