firaq o vasl se haT kar koi rishta hamara ho
baghair us ke bhi shayad zindagi ham ko gavara ho
nikal aa.e jo ham ghar se to sau raste nikal aa.e
abas tha sochna ghar men koi ghaibi ishara ho
na is Dhab ki bhi zulmat ho ki sab mil kar dua mangen
koi jugnu hi aa nikle na gar koi sitara ho
ziyan ki zad pe duniya men ka.i log aur bhi honge
to phir ai na-muradi tu mire gham ka sahara ho
taqabul kasrat o qillat ka kuchh ma.ani nahin rakhta
andhera chiir kar nikle agarche ik sharara ho
purane gham tire to juzv-e-jan ham ne bana Daale
bisat-e-dil ki ḳhvahish hai na.e gham ka utara ho
fasil-e-shahr pe raushan agar hon husn ki sham.en
to ik ik lafz ‘shahid’ raushni ka isti.ara ho
Leave a Reply