firaq-e-yar men huun is qadar udaas udaas
baghair bachchon ke jaise ho ghar udaas udaas
shikari aa.e hain ya.ani parind ja.enge
ye baat sun ke hua hai shajar udaas udaas
na jaane kya mire zaḳhmon men dekh baiTha hai
ki ho gaya hai mira charagar udaas udaas
ye vo gali hai jahan shadmani rahti hai
so mere dost yahan se guzar udaas udaas
kabhi kabhar to ḳhud zaar zaar roti hain
udasiyan bhi mujhe dekh kar udaas udaas
ye kya hua ki Dubo kar mujhe baḌe din se
ḳhafa ḳhafa si nadi hai bhanvar udaas udaas
natija tark-e-ta.alluq ka ek sa kab hai
udhar vo ḳhush hai bahut main idhar udaas udaas
Leave a Reply