fikr-e-ranj-o-rahat kaisi
dozakh kaisa jannat kaisi
badli un ki aadat kaisi
ulti apni qismat kaisi
har shai men hai us ka jalva
kasrat men hai vahdat kaisi
aapas men ai gabru musalman
nahaq nahaq hujjat kaisi
ulfat men zillat rakkhi hai
izzat kaisi hurmat kaisi
zohd-e-zahid la-hasil hai
begari ko ujrat kaisi
sun kar meri sina-kubi
bole vo ye naubat kaisi
chashm-e-vahdat-e-bin ke aage
aine ki surat kaisi
mar jaenge ham furqat men
rah jaegi hasrat kaisi
aalam hai ai mah-ru tujh par
shahron men hai shohrat kaisi
utthenge jab vo sohbat se
barham hogi sohbat kaisi
be-khud ho ja meri surat
ai suufi ye halat kaisi
duniya ke jhagdon se chhute
mar kar paai fursat kaisi
zulfon ke phandon se nikle
taali sar se aafat kaisi
fasl-e-gul ke aate aate
so jaati hai vahshat kaisi
Leave a Reply