fazaon se guzarta ja raha huun
ḳhalaon men bikharta ja raha huun
main registan men baiTha huun lekin
samundar men utarta ja raha huun
zamana lamha lamha ji raha hai
main lamha lamha marta ja raha huun
vo jitne duur hote ja rahe hain
main utna hi sanvarta ja raha huun
chala huun apne se do haat karne
magar ḳhud se bhi Darta ja raha huun
main nuqta ban ke ik markaz pe yaaro
na jaane kyuun Thaharta ja raha huun
miTane par bhi main urdu ki manind
sanvarta aur nikharta ja raha huun
main kaali jhiil men Duuba tha ḳhud hi
magar ḳhud hi ubharta ja raha huun
main ‘qaisar’ apni ankhon se Tapak kar
kisi dil men utarta ja raha huun
Leave a Reply