Ishrat Moin Seemaa
tera va.ada hai sabab dil ke bahal jaane ka
mausam hijr men har phuul ke khil jaane ka
ḳhamushi aag lagati hai mire charon or
mujh ko afsos hai alfaz ke jal jaane ka
qatl gahon men rakhe aa.ine dekhe to kaha
kitna saman tha qatil ke dahal jaane ka
umr-e-rafta ke har ik taaq pe jalta hai diya
tum se milne ka bichhaḌne ka sambhal jaane ka
mausam-e-hijr ho ya vasl ki vo raat hasin
‘sima’ dhaḌka sa laga rahta hai Dhal jaane ka
Leave a Reply