Poet
paheli kaun bujhega javab-e-naz-e-janan ki
ham us huun ko samajhte hain nahin ki us ne ya haan ki
azal se ye amanat hai junun-e-fitna-saman ki
ḳhirad ke haath lag sakti nahin dhajji gareban ki
agar maujon se Dar ke ham bhi sahil hi pe rah jaate
to duniya par haqiqat hashr tak khulti na tufan ki
giraftar-e-bala ke haq men vo zanjir banta hai
jo naala niind uḌa deta hai zindan ke nigahban ki
kahe kuchh to bharam jaa.e jo chup baiThe to huuk uTThe
zarurat maut ban jaati hai ghairat-dar insan ki
kuchh aise phuul ham ne bhi chune the apne daman men
jo apne saath raunaq le ga.e gulzar-e-imkan ki
vo divana mire nazdik hoshyaron se achchha hai
haqiqat jis ne kuchh samjhi nahin tar-e-rag-e-jan ki
ye majburi tamasha chashm-e-alam men bana varna
ḳhushi se dhajjiyan koi uḌata hai gareban ki
chaman kya hai namuna mere ik rangin tasavvur ka
nashat-e-kar ne surat badal di hai bayaban ki
nikharenge yahi kuchh phuul aur kanTe ki rangat ko
phaTe daman pe jo tariḳh likkhenge gulistan ki
muqaddar men jo thi ai ‘jurm’ qaid-e-zist ki saḳhti
anasir ke ravabit ban ga.e divar-o-zindan ki
Leave a Reply