faza men kaif-fashan phir sahab hai saaqi
phir apne rang pe daur-e-shabab hai saaqi
ye talḳh yaden kam-az-kam bhula to deti hai
sharab kuchh bhi ho aḳhir sharab hai saaqi
jo apni hasti ki masti miTa ke aata hai
tire huzur vahi baryab hai saaqi
gham-e-firaq gham-e-zindagi gham-e-duniya
sharab saare ghamon ka javab hai saaqi
tiri nigahon se maiḳhane jaam bharte hain
tiri nigahon ka koi javab hai saaqi
ba-qaul-e-‘charḳh’ yahan mastiyan ubharti hain
ye mai-kada to jahan-e-shabab hai saaqi
Leave a Reply