Fasla

havaen le gaiin vo ḳhaak bhi uda ke jise

kabhi tumhare qadam chhu gae the aur main ne

ye ji se chaha tha daman men bandh lunga use

suna tha main ne kabhi yuun hua hai duniya men

ki aag lene gae aur payambari paai

kabhi zamin ne samundar ugal diye lekin

bhanvar hi le gae kashti bacha ke tufan se

men sochta huun payambar nahin agar na sahi

ki itna bojh uthane ki mujh men taab na thi

magar ye kyuun na hua gham mila tha duuri ka

to hausla bhi mila hota sang o aahan sa

magar ḳhuda ko ye sab sochne ka vaqt kahan?

Leave a Comment