fasl-e-gul ki hai aabru ham se
ham se hai sail-e-rang-o-bu ham se
husn-e-fitrat ke razdar hain ham
phuul karte hain guftugu ham se
farsh gul par ba-vaqt-e-sub.h-e-nasim
aa ke milti hai ba-vazu ham se
ham shahid-e-gham-o-alam hi sahi
zindagi to hai surḳh-ru ham se
naam saaqi ka ho gaya varna
mai-kade men hai ha-o-hu ham se
bazm-e-rindan men ab bhi baaqi hai
vaq.at-e-bada-o-subu ham se
ham se hai ‘dard’-o-‘dagh’ ki azmat
ham se hai nam-e-‘arzu’ ham se
sikhna ho to siikh le ‘mansha’
koi andaz-e-justuju ham se
Leave a Reply