fasl-e-gul fasl-e-khizan jo bhi ho khush-dil rahiye
koi mausam ho har ik rang men kamil rahiye
mauj o girdab o talatum ka taqaza hai kuchh aur
rahiye mohtat to bas ta-lab-e-sahil rahiye
dekhte rahiye ki ho jaae na kam shan-e-junun
aaina ban ke khud apne hi muqabil rahiye
un ki nazron ke siva sab ki nigahen utthin
mahfil-e-yar men bhi zinat-e-mahfil rahiye
dil pe har haal men hai sohbat-e-na-jins haram
haif-sad-haif ki na-jinson men shamil rahiye
daagh siine ka dahakta rahe jalta rahe dil
raat baaqi hai jahan tak mah-e-kamil rahiye
janiye daulat-e-kaunain ko bhi jins-e-haqir
aur dar-e-yar pe ik bose ke saail rahiye
ashiqi sheva-e-rindan-e-bala-kash hai miyan
vajh-e-shaistagi-e-khanjar-e-qatil rahiye
Leave a Reply