Saleem Shahid
farsh-e-zamin pe barg-e-ḳhizani ka rang hai
divar-o-dar pe naql-e-makani ka rang hai
ankhon men tairte hain safine vida.a ke
lahje men ab-ju ki ravani ka rang hai
ifrat-e-chashm-o-lab ki kahin siḌhiyon men thi
lekin chhaton pe qaht-o-girani ka rang hai
galon pe ik lakir si sailab-e-ashk se
divar par kahin kahin paani ka rang hai
surḳhi ke saath aam sa be-sharh vaqi.a
tasvir men ajiib ma.ani ka rang hai
qasid ke donon haath khule lab ḳhamosh hain
kuchh aankh men payam-e-zabani ka rang hai
logon ne shauq-e-sabz men pakne na di ye fasl
har-chand surḳh ahd-e-javani ka rang hai
Leave a Reply