musahib-e-shah se kaho ki
faqih-e-azam bhi aaj tasdiq kar gae hain
ki fasl phir se gunahgaron ki pak gai hai
huzur ki jumbish-e-nazar ke
tamam jallad muntazir hain
ki kaun si had janab jaari karen
to tamil-e-bandagi ho
kahan pe sar aur kahan pe dastar utarna ahsan-ul-amal hai
kahan pe hathon kahan zabanon ko qata kijiye
kahan pe darvaza rizq ka band karna hoga
kahan pe asaishon ki bhukon ko maar diije
kahan bategi luaan ki chhut
aur kahan par
rajm ke ahkam jaari honge
kahan pe nau saala bachchiyan chahal saala mardon ke saath
sangin men pirone ka hukm hoga
kahan pe iqbali mulzimon ko
kisi tarah shak ka faeda ho
kahan pe masum daar par khinchna padega
huzur ahkam jo bhi jaari karenge
faqat iltija ye hogi
ki apne irshad-e-aliya ko
zabani rakhen
vagarna
qanuni uljhanen hain!