faqirana hai dil muqim us ki rah ka
gharaz kya ki muhtaj ho badshah ka
khadang aah ka ai falak be-tarah hai
bharosa tu taron ki mat kar zirah ka
kharabat ki jab se lazzat padi hai
chhuta baithna masjid-o-khanqah ka
tavaf-e-haram tujh ko zahid mubarak
mira aur tera nahin saath rah ka
sanam-khana jaata huun tu mujh ko nahaq
na bahka na bahka na bahka na bahka
tire munh se kuchh bu jo aati hai mai ki
dimagh-e-dil us vaqt jaata hai mahka
raqibon ke dil chaak misl-e-katan hon
guzar us taraf ho agar apne rah ka
tiri ashnai men kya ham ne paaya
diya naqd-e-dil aur apni girah ka
chamak kar tu ai barq mat maar chashmak
to maston ki atish ko mat aur dahka
tabhi lutf hai saqiya mai-kashi ka
ki tu bhi bahak aur mujh ko bhi bahka
kabhi tujh se ‘insha’ ne bosa na manga
gunahgar hai vo faqat ik nigah ka
Leave a Reply