faqih-e-shahr ka lahja hai pur-jalal bahut
tabhi to shahr men phaila hai ishti.al bahut
vo ek shaḳhs ki mahrum-e-shana-o-sar hai
use hai jubba-o-dastar ka ḳhayal bahut
vo pahle aag lagata hai phir bujhata hai
use hai sho.abda-bazi men bhi kamal bahut
amir-e-shahr ki saari tijoriyan ḳhali
gada-e-shahr ke kashkol men hai maal bahut
muhafizon ki zarurat tumhare jaison ko
hamare jaison ko apne badan ki Dhaal bahut
kahan se siikh ke aa.e ho guftugu ka hunar
uTha rahe ho sar-e-bazm tum saval bahut
usi ke haath pe bai.at usi se ahd-e-vafa
tumhen yazid ka jis par tha ehtimal bahut
faza men uḌte parindon ko bhi nahin ma.alum
ki baghban ne bichha.e hain ab ke jaal bahut
jo ho raha hai tamasha vahi dikhata hai
kalam hota hai ‘nasir’ ka hasb-e-hal bahut
Leave a Reply