Poet
falak ye jaur-o-sitam mujh se na-tavan ke liye
main hi tha kya tire zulmon ke imtihan ke liye
dil ashiqon ke the pamali-e-butan ke liye
na jaur-e-ghair-o-jafa-ha-e-asman ke liye
main musta.id huun agar nala-o-fughan ke liye
to kuchh se kuchh abhi ho jaa.e asman ke liye
phansa ke yaar ki zulfon men ham ne dil dekho
ḳharidi aur bala ek apni jaan ke liye
sitam hai fasl-e-bahari men baghban ka hukm
na ho.e baagh men bulbul ko ashiyan kai liye
kahega naseha kya fa.ede ki tu mere
hue hain ḳhalq hi ashiq faqat ziyan kai liye
na ḳharch ba-ḳhuda umr-e-aziz apni kar
mila nahin tujhe ye naqd ra.egan ke liye
yahan hain TukḌe jigar mah-vashon ke be-dekhe
ye baat kab hai mayassar bhala katan ke liye
hamara rokna achchha nahin hai sun lena
ek aur roz bura hoga pasban kai liye
na ho.e kyuun dar-e-asnam sajda-gah apna
jabin bani hai buton hi ke astan ke liye
basa hai dil ke mire qasr men tasavvur-e-yar
makin tha ye saza-var is makan ke liye
suna ke qissa-e-gham apna us ko apne hi
dil-o-jigar ne maze gham ki dastan ke liye
use to roz bahane ko chahiyen dariya
kahan se la.un main us chashm-e-ḳhunfishan ke liye
nahin to bar-sar-e-har-mudda.a hai sau sau baar
par ik zaban jo hilti nahin so haan kai liye
chhupa rahe na ruḳh-e-yar zulf men kyun-kar
taqayya farz hai momin ko hifz-e-jan ke liye
suna jo mad.h bhi kiije to kiije aise ki
ki jis ki mad.h ho faḳhr ahl-e-asman ke liye
na ye ki har kas-o-na-kas ke bhaaT ja.iye ban
pa.e-umid-e-zar-e-naqd-o-hirs-e-nan ke liye
nahin hai mad.h kisi ke liye yahan zeba
jo hai to hai nabi-e-aḳhiruz-zaman ke liye
vo vo hai naam zaban par gar us ka aa jaave
to lazzat aur hi hasil ho kam-o-jan ke liye
vo vo hai nam-e-ḳhuda dekho jis ka zarra-e-lutf
farogh-baḳhsh hai is tira-ḳhak-dan ke liye
usi ke hai ruḳh-e-anvar se ye jahan raushan
usi se nuur hai ḳhurshid-e-asman ke liye
vo kaun sarvar-e-alam mohammad-e-arabi
ki jis ki zaat se hai faiz do-jahan ke liye
ata kiya hai ḳhuda ne vo haan use dil-o-dast
ki jis se pahunche hai imdad bahr-o-kan ke liye
kalid-e-qufl-e-dar-e-arzu hain us ki bhaven
bila-mubalagha kahta huun ins-o-jan ke liye
ita.at us ki zaḳhira hai bas sa.adat ka
yahan ke vaste aur mulk-e-javedan ke liye
vo jo zaban ki ho us ki mad.h se sakit
majal-e-nutq na ho ‘aish’ us zaban ke liye
Leave a Reply