falak ke na in mah-paron ko dekho
jo miTTi men hain un sitaron ko dekho
kabhi karvan bhi numudar hoga
nigahen jama.e ghubaron ko dekho
nikal kar kabhi sahr-e-sud-o-ziyan se
mohabbat ke ujḌe dayaron ko dekho
chaman men ye kis chaal se chal rahe ho
na phulon ko dekho na ḳharon ko dekho
zaban husn ki mo’atabar kab hui hai
kinayon ko samjho isharon ko dekho
musalleh qataren idhar bhi udhar bhi
zara amn ki rah-guzaron ko dekho
chaman ki ḳhizan par na aansu bahao
nazar hai to kal ki baharon ko dekho
na dekho daraḳhton ki duuri chaman men
lipaTti hui shaḳh-saron ko dekho
zara jhank kar ghurfa-e-mai-kada se
taraste labon ki qataron ko dekho
kisi ke sitam ko bhi samajhte tavajjoh
are in taghaful ke maron ko dekho
vo daur-e-hayat-e-jahan aa gaya hai
bhanvar men raho aur kinaron ko dekho
baḌho aur hathon ka ik pal bana lo
kinaron se kab tak savaron ko dekho
bina-e-baqa dhamkiyon par fana ki
na.e jag ke parvardigaron ko dekho
kabhi nam-e-‘mulla’ na aaya zaban tak
ye duniya hai ‘mulla’ ke yaron ko dekho
Leave a Reply