Ek Wahshat Hai Rahguzaron Mein

ek vahshat hai rahguzāroñ meñ

qāfile luT ga.e bahāroñ meñ

saaz ḳhāmosh aarzū bīmār

koī naġhma nahīñ hai tāroñ meñ

is taraf bhī nigāh-e-duzdīda

ham bhī haiñ zindagī ke māroñ meñ

ye to ik ittifāq hai varna

aap aur mere ġham-gusāroñ meñ

aadmī aadmī na ban paayā

bastiyāñ luT ga.iiñ ishāroñ meñ

dekh kar vaqt ke taġhayyur ko

chāñd sahmā huā hai tāroñ meñ

the kabhī rūh-e-anjuman ‘shaukat’

ab to haiñ ajnabī se yāroñ meñ

Leave a Comment