ek vahshat hai rahguzaron men
qafile luT ga.e baharon men
saaz ḳhamosh aarzu bimar
koi naghma nahin hai taron men
is taraf bhi nigah-e-duzdida
ham bhi hain zindagi ke maron men
ye to ik ittifaq hai varna
aap aur mere gham-gusaron men
aadmi aadmi na ban paaya
bastiyan luT ga.iin isharon men
dekh kar vaqt ke taghayyur ko
chand sahma hua hai taron men
the kabhi ruh-e-anjuman ‘shaukat’
ab to hain ajnabi se yaron men
Leave a Reply