Ek Umr Hoti Hai

Ahmad Rahi

ek umr hoti hai

jis men koi ladka ho

ya vo koi ladki ho

sochte hain donon hi

ham hi harf-e-avval hain

is jahan-e-kohna ko

apni fikr-e-nau se ham

ik lagan ki lau se ham

jis tarah ka chahenge

vaisa hi bana lenge

pattharon ko mar-mar ke

paikaron men dhalenge

ek umr hoti hai

jis men koi ladka ho

ya koi ladki ho

sochte hain donon hi

kitne azm the apne

nazr-e-khak hain saare

baat damanon ki kya

chaak chaak dil bhi hain

ham ki harf-e-avval the

harf-e-akhirin bhi nahin

ham ki asman se the

zarra-e-zamin bhi nahin

ek umr hoti hai

khvahishon ki jazbon ki

ek umr hoti hai

kahishon ki sadmon ki