Poet
ik tasalsul se ra.igani hai
zindagi bhi ajab kahani hai
sar men sauda naya samaya hai
dil men vahshat vahi purani hai
tujh gali men ghubar ban ke miyan
hijr ki ḳhaak ham ne chhani hai
mujh ko tahlil kar diya pal men
kya ajab marg-e-na-gahani hai
dil men matam-kunan hai halqa-e-gham
tere jaane ki soz-ḳhvani hai
dasht-e-imkan to ek pal hai magar
pa-e-imkan to javedani hai
kis qadar huun shikasta-pa phir bhi
ḳhud ko paane ki phir se Thani hai
Leave a Reply