ik sho.ala-e-hasrat huun miTa kyuun nahin dete
mujh ko mire jiine ki saza kyuun nahin dete
main jin ke liye roz salibon pe chaḌha huun
vo meri vafaon ka sila kyuun nahin dete
kyuun dard ki shiddat ko baḌhate ho tabibo
is dard-e-musalsal ki dava kyuun nahin dete
sunta huun ki har moḌ pe rahbar hain magar vo
mujh ko meri manzil ka pata kyuun nahin dete
kuchh baat ‘nafas’ dil men liye baiThe ho kab se
aa.e ho yahan tak to bata kyuun nahin dete
Leave a Reply