Ek Shaera Ki Shadi Par

ai ki tha uns tujhe ishq ke afsanon se

zindagani tiri abad thi rumanon se

sher ki god men palti thi javani teri

tere sheron se ubalti thi javani teri

rashk-e-firdaus tha har husn bhara khvab tira

ek pamal khilauna tha ye mahtab tira

nikhat-e-sher se mahki hui rahti thi sada

nashsha-e-fikr men bahki hui rahti thi sada

shirkat-e-ghair se begana the naghme tere

ismat-e-hur ka afsana the naghme tere

sher ki khalvat-e-rangin thi pari-khana tira

mast khvabon ke jaziron men tha kashana tira

ghaeb-az-chashm thi jannat ki baharon ki tarah

dast-e-insan se thi mahfuz sitaron ki tarah

sohbat-e-ghair se ghabrati thi tanhai tiri

aine se bhi to sharmati thi tanhai tiri

subh ki tarah se doshiza thi hasti teri

bu-e-gul ki tarah pakiza thi hasti teri

naghma-o-sher ke firdaus men tu rahti thi

yaksar ilham o tarannum tha jo tu kahti thi

tere ashar the jannat ki baharon ke hujum

tere afkar the zarrin sitaron ke hujum

dard-e-sheri ke taassur se to maghmum thi tu

asman ka magar ik ghuncha-e-maasum thi tu

mauj-e-kausar ka chhalakta hua paimana thi

ghair honton ke tasavvur se bhi begana thi

ab gavara hui kyuun ghair ki sohbat tujh ko

kyuun pasand aa gai na-jins ki shirkat tujh ko

auj-e-taqdis ko pasti ki ada bha gai kyuun

teri tanhai ki jannat pe khizan chha gai kyuun

sher o ruman ke vo khvab kahan hain tere

vo nuqush-e-gul-o-mahtab kahan hain tere

kaun si turfa ada bha gai is duniya men

khuld ko chhod ke kyuun aa gai is duniya men

ho gai aam tu nur-e-mah-e-taban ki tarah

aah kyuun jal na bujhi sham-e-shabistan ki tarah

apni doshiza baharon ko na khona tha kabhi

vo kali thi tu jise phuul na hona tha kabhi

iffaten mit ke javani ko mita jaati hain

phuul kumhlate hain kaliyan kahin kumhlati hain

bulbul-e-mast-nava dasht men kyuun rahne lagi

naghma-e-tar ki jagah marsiya kyuun kahne lagi

havas-aluda hui paak javani teri

ghair ki raat hai ab aur kahani teri

kis ko maalum tha tu is qadar arzan hogi

zinat-e-mahfil o pamal-e-shabistan hogi

jazb-e-iffat ka mayassar tha jo irfan tujh ko

kyuun na marghub hua sheva-e-janan tujh ko

tirgi hirs ki huron ko bhi bahka hi gai

tere bistar pe bhi akhir ko shikan aa hi gai

ab nahin tujh men vo huron ki si iffat baaqi

huur thi tujh men, gaii, rah gai aurat baaqi

haan vo aurat jise bachchon ka fasana kahiye

barbat-e-nafs ka ik fuhsh tarana kahiye

jis men hai zahr ufunat ka vo paimana kahen

ik gunahon ka bhabhakta hua mai-khana kahen

nauha-khvan apni javan maut ka hone de mujhe

muskura tu magar is haal pe rone de mujhe

Leave a Comment