Ek Se Rabt Ek Se Hai Bigad

ek se rabt ek se hai bigad

rose hai vaan yahi ukhad-pachhad

ab vo dil men kabhi nahin aate

muddaton se ye ghar pada hai ujaad

kyuun hai bekar mausam-e-gul men

jeb kar chaak aur gareban phaad

kar-e-ashiq jo ho nigah men durust

kahiye kya aap ka hai is men bigad

kahte ho ghair jaae to aa.uun

ḳhuub rakkhi hai aap ne ye aad

sang-dil rakh-rakhao dil ka rakh

kahin is shishe men na aae darad

ghair jaae to kaam kyuun na bane

duur chhati se ho kahin ye phaad

qad ko un ke kaha tha sarv to vo

pichhe lipte hain mere ho kar jhaad

ishq se rah alag jahan tak ho

kahin sar par na aa pade ye phaad

qatl to kar chuke na ho badnam

mere lashe ko do zamin men gaad

us ka chhaya hua hai abr-e-sitam

kyuun na tiron ki mujh pe ho bauchhad

koi mehman taaza varid hai

band rahte hain raat din jo kivad

vo tafang-e-mizha hain saf-ara

tum pe ‘majruh’ chal na jaae baad

Leave a Comment