Ek Rishta Dard Ka Hai Mere Uske Darmiyan

Iftikhar Raghib

ek rishta dard ka hai mere us ke darmiyan

phir bhi kitna fasla hai mere us ke darmiyan

mere us ke darmiyan yuun hi rahengi ranjishen

koi jab tak tisra hai mere us ke darmiyan

baat ham donon ki hai ham ḳhud nimaT lenge kabhi

kyon zamana bolta hai mere us ke darmiyan

kal talak the saath ham ik dusre ke aur aaj

muddaton ka fasla hai mere us ke darmiyan

chhoTi-moTi ranjishen hain ḳhud-ba-ḳhud miT ja.engi

aur abhi bigḌa hi kya hai mere us ke darmiyan

us ko bhi ho ja.egi mujh se mohabbat par abhi

guftugu ka silsila hai mere us ke darmiyan

aarzu dil ki hai ‘raghib’ umr bhar raushan rahe

jo yaqin ka ik diya hai mere us ke darmiyan