apne jiine ke ham asbab dikhate hain tumhen
dosto aao ki kuchh ḳhvab dikhate hain tumhen
tum ne gharqab safine to bahut dekhe hain
sar paTakte hue sailab dikhate hain tumhen
husn ka shor jo barpa hai zara thamne do
ishq ka lahja-e-nayab dikhate hain tumhen
mere phaile hue daman ke kabhi saath chalo
munh chhupate hue ahbab dikhate hain tumhen
chhat pe aa jaao har ik kaam se farigh ho kar
chandni raat ke mehrab dikhate hain tumhen
kaise ankhon men utarte hain lahu ke qatre
kaise banta hai ye tezab dikhate hain tumhen
tum zara pyaas ki me.araj pe pahuncho to sahi
regzaron men bhi girdab dikhate hain tumhen
ek maqsad ke liye amn ki tahriron men
ḳhuun se likkhe hue baab dikhate hain tumhen
Leave a Reply