Khawer Eijaz
ik qatra-e-ma.ani se afkar ka dariya ho
ai zarra-e-agahi ab phail ke sahra ho
rafta rahe vabasta har haal dariche se
farda ke jharokon men maazi ka ujala ho
ai bichhḌi hui naddi kis dasht men bahti hai
phir janib-e-dariya aa aur shamil-e-dariya ho
afaq-e-bulandi se avaz ye aati hai
ik asr men shamil ho ik pal se alahada ho
lamhe ki haqiqat kya sadiyon ke tanazur men
lekin jise tu chahe vo rashk-e-zamana ho
is dhuup ke raahi ko anjam se kuchh pahle
ik aisi masafat de jis par tira saaya ho
aisa na ho vo mange tasdiq ka ik lamha
aur ham ne vahi lamha mahfuz na rakkha ho
Leave a Reply