adil-mansuri

Ek Qatra Ashk Ka Chhalka To Dariya Kar Diya

ek qatra ashk ka chhalka to dariya kar diya

ek musht-e-khak jo bikhri to sahra kar diya

mere tuute hausle ke par nikalte dekh kar

us ne divaron ko apni aur uncha kar diya

vardat-e-qalb likkhi ham ne farzi naam se

aur hathon-hath us ko khud hi le ja kar diya

us ki narazi ka suraj jab sava neze pe tha

apne harf-e-ijz hi ne sar pe saaya kar diya

duniya bhar ki khaak koi chhanta phirta hai ab

aap ne dar se utha kar kaisa rusva kar diya

ab na koi khauf dil men aur na ankhon men umiid

tu ne marg-e-na-gahan bimar achchha kar diya

bhuul ja ye kal tire naqsh-e-qadam the chand par

dekh un hathon ko kis ne aaj kaasa kar diya

ham to kahne ja rahe the hamza-e-ye vassalam

biich men us ne achanak nun-ghunna kar diya

ham ko gaali ke liye bhi lab hila sakte nahin

ghair ko bosa diya to munh se dikhla kar diya

tirgi ki bhi koi had hoti hai akhir miyan

surkh parcham ko jala kar hi ujala kar diya

bazm men ahl-e-sukhan taqtia farmate rahe

aur ham ne apne dil ka bojh halka kar diya

jaane kis ke muntazir baithe hain jhadu pher kar

dil se har khvahish ko ‘adil’ ham ne chalta kar diya

More Poems

Leave a Comment