Ek Parinda Shakh Par Baitha Hua

ik parinda shaḳh par baiTha hua

hasraton se asman takta hua

ik sadi ki dastan kahta hua

ik shajar dalan men sukha hua

ik zamin pairon talak simTi hui

ik samundar duur tak phaila hua

ik kahani phir janam leti hui

ik fasana dafn phir hota hua

ik kiran aflak se aati hui

ik andhera chand par baiTha hua

ik zamin do buund ko tarsi hui

ik nagar sailab men duuba hua

ek kashti gharq-e-ḳhun hoti hui

ik masiha chhoḌ kar jaata hua

ek chiḌiya chahchahen karti hui

ik shikari taaq men baiTha hua

ik gilahri peḌ par chaḌhti hui

ik musavvir soch men duuba hua

ik dagar su-e-falak jaati hui

ik sitara baam par utra hua

ik ghazal phir dastaken deti hui

ik tasavvur phir badan leta hua

Leave a Comment