ek khush-ru se mohabbat ho gai
dil-lagi ki achchhi surat ho gai
laakh parda kijiyo hota hai kya
aap ki zahir haqiqat ho gai
ishq-bazi men ye azadi mili
din-o-duniya se faraghat ho gai
sunte hain vaaiz ki mai-khana men aaj
rehn dastar-e-fazilat ho gai
but-parasti ki khuda ko chhod kar
kaisi ulti apni qismat ho gai
ham ko kiya khush-ru jahan men laakh hon
ho gai jis se mohabbat ho gai
lag gai kis ki khuda jaane nazar
kaisi barham apni sohbat ho gai
us ka bahr-e-gham se beda paar hai
jis pe ‘varis’ ki inayat ho gai
ab gale mil jaao ‘aughat’ pyaar se
ho chuka shikva-shikayat ho gai