Sajjad Babar
ik hava uTThegi saare bal-o-par le ja.egi
ye na.i rut ab ke sab kuchh luuT kar le ja.egi
ek ḳhadsha pahle darvaze se apne saath hai
raston ki dilkashi ḳhu-e-safar le ja.egi
ek chaurahe pe la kar chhup gaya hai aftab
koi avara karan ab dar-ba-dar le ja.egi
ik tavaqqo le ke Takraya huun har rahrav ke saath
koi jhunjhla.i hui Thokar to ghar le ja.egi
dil ke kaale ghaar men sanson ke patthar jab gire
ek saa.at ki chamak sadiyon ke Dar le ja.egi
fikr ko ‘sajjad’ pahna.e pasandida libas
ye nahin socha ki vo gahra asar le ja.egi
Leave a Reply