Saleem Faraz
ik ek lafz men ka.i pahlu kahan se aa.e
janan tire suḳhan men ye jaadu kahan se aa.e
jab tirgi men chand sitare bhi gum hue
palkon ke shamiyane men jugnu kahan se aa.e
suljha raha tha pech-o-ḳham-e-zindagi magar
hathon men yak-ba-yak tire gesu kahan se aa.e
shikva nahin hai tujh se ki is rahguzar men
saa.e na saath aa.e to phir tu kahan se aa.e
uljhan tamam umr yahi thi ki ziist men
aa.e kahan se rang ki ḳhushbu kahan se aa.e
sahra ki tarah ḳhushk thi phir us ke lams se
be-iḳhtiyar aankh men aansu kahan se aa.e
Leave a Reply