Faiz Ul Hasan Khayal
jab tak mizaj-e-dost men kuchh barhami rahi
goya bujhi bujhi si miri zindagi rahi
jis par nigah-e-lutf-e-karam aap ki rahi
hairat se har nigah use dekhti rahi
go main raha kashakash-e-dauran se ham-kanar
lekin mire labon pe hansi khelti rahi
laaya hai ishq ne mujhe aise maqam par
ḳhud-agahi rahi na ḳhuda-agahi rahi
josh-e-junun ne manzil-e-maqsud pa liya
aql-e-salim dekhti hi dekhti rahi
sab kuchh mujhe ‘ḳhayal’ ki duniya men mil gaya
lekin tumhare husn-e-nazar ki kami rahi
Leave a Reply