Ek Din Tamam Farz Ada Kar Diye Gae

Kuldeep Kumar

ik din tamam farz ada kar diye ga.e

saare asir-e-zat riha kar diye ga.e

vo hi to gham-gusar hamare the shahr men

sunte hain ab ke vo bhi ḳhuda kar diye ga.e

do dil kisi bhi tarah na jab ho sake alag

do naam hi varaq pe juda kar diye ga.e

vo furqaton ke din the vo vaqt-e-uruj tha

kitne hi zaḳhm dil ko kama kar diye ga.e

sham-e-siyah bas apna sa munh le ke rah ga.i

saare charagh nazr-e-hava kar diye ga.e

kuchh gham-nasib ishq the kuchh gham-nasib ziist

kuchh gham mizaj-e-dil pe ata kar diye ga.e

darkar ho gaya tha kahani men kuchh naya

ham log is liye bhi juda kar diye ga.e

ik chehra-e-hasin miTane ki zid thi aur

ankhon ke saare rang fana kar diye ga.e

kuchh roz ba.ad ho ga.e jab ḳhugar-e-qafas

chupke se sab parinde riha kar diye ga.e