Qaisar Siddiqi
ik bhiiḌ hai jalvon ki aur meri nazar tanha
hai a.ina-ḳhane men ḳhud a.ina-gar tanha
un paanv ke chhalon se puchho ye bata.enge
tai kaise kiya ham ne sho.alon ka safar tanha
jalte hue mausam men is tarah vo hansta hai
sahra men hanse jaise koi gul-e-tar tanha
kya janiye kyuun mujh par ye ḳhaas inayat hai
kya janiye jalta hai kyuun mera hi ghar tanha
ik shor-e-qayamat hai aur bhiiḌ hai chehron ki
is daur men rahta hai har shaḳhs magar tanha
tanha.i ka gham tum ko us vaqt maza dega
meri hi tarah tum bhi ho jaao agar tanha
Leave a Reply