ik bevafa ko dard ka darman bana liya
ham ne to aah kufr ko iman bana liya
dil ki ḳhalish-pasandiyan hain ki allah ki panah
tir-e-nazar ko jan-e-rag-e-jan bana liya
mujh ko ḳhabar nahin mire dil ko ḳhabar nahin
kis ki nazar ne banda-e-ehsan bana liya
mahsus kar ke ham ne mohabbat ka har alam
ḳhvab-e-subuk ko ḳhvab-e-pareshan bana liya
dast-e-junun ki uqda-kusha.i to dekhiye
daman ko be-niyaz gareban bana liya
taskin-e-dil ki ham ne bhi parvah chhoḌ di
har mauj-e-gham ko hasil-e-tufan bana liya
jab un ka naam aa gaya ham muztarib hue
aahon ko apni ziist ka unvan bana liya
ham ne to apne dil men vo gham ho ki ho alam
jo koi aa gaya use mehman bana liya
a.ina dekhne ki zarurat na thi koi
apne ko ḳhud hi aap ne hairan bana liya
ik be-vafa pe kar ke tasadduq dil-o-jigar
‘bahzad’ ham ne ḳhud ko pareshan bana liya
Leave a Reply