Naushad Ali
ik be-qarar dil se mulaqat kijiye
jab mil ga.e hain aap to kuchh baat kijiye
pahle-pahal hua hai miri zindagi men din
zulfon men munh chhupa ke na phir raat kijiye
nazron se guftugu ki haden ḳhatm ho chukin
jo dil men hai zaban se vahi baat kijiye
kal intiqam le na mira pyaar aap se
itna sitam na aaj mire saath kijiye
bas ek ḳhamushi hai har ik baat ka javab
kitne hi zindagi se savalat kijiye
nazren mila mila ke nazar pher pher ke
majruh aur dil ke na halat kijiye
dil ke siva kisi ko nahin jin ki kuchh ḳhabar
duniya se kiya bayan vo hikayat kijiye
Leave a Reply