Ek Be-Qarar Dil Se Mulaqat Kijiye

ik be-qarār dil se mulāqāt kījiye

jab mil ga.e haiñ aap to kuchh baat kījiye

pahle-pahal huā hai mirī zindagī meñ din

zulfoñ meñ muñh chhupā ke na phir raat kījiye

nazroñ se guftugū kī hadeñ ḳhatm ho chukīñ

jo dil meñ hai zabāñ se vahī baat kījiye

kal intiqām le na mirā pyaar aap se

itnā sitam na aaj mire saath kījiye

bas ek ḳhāmushī hai har ik baat kā javāb

kitne hī zindagī se savālāt kījiye

nazreñ milā milā ke nazar pher pher ke

majrūh aur dil ke na hālāt kījiye

dil ke sivā kisī ko nahīñ jin kī kuchh ḳhabar

duniyā se kiyā bayāñ vo hikāyāt kījiye

Leave a Comment