ek aina ru-ba-ru hai abhi
us ki khushbu se guftugu hai abhi
vahi khana-ba-dosh ummiden
vahi be-sabr dil ki khu hai abhi
dil ke gunjan raston pe kahin
teri avaz aur tu hai abhi
zindagi ki tarah khiraj-talab
koi darmanda aarzu hai abhi
bolte hain dilon ke sannate
shor sa ye jo char-su hai abhi
zard patton ko le gai hai hava
shakh men shiddat-e-numu hai abhi
varna insan mar gaya hota
koi be-nam justuju hai abhi
ham-safar bhi hain rahguzar bhi hai
ye musafir hi ku-ba-ku hai abhi
Leave a Reply