Ehtimam-E-Rang-O-Bu Se Gulistan Paida Karen

Urooj Zaidi Badayuni

ehtimam-e-rang-o-bu se gulistan paida karen

aao mil-jul kar bahar-e-be-ḳhizan paida karen

kyuun sukut-e-be-mahal se dastan paida karen

dida-o-danista apne razdan paida karen

raas aa sakta hai mir-e-karvan banne ka ḳhvab

shart ye hai pahle apna karvan paida karen

kar-ara.i to ḳhud hai hasil-e-takmil-e-kar

dil men kya andesha-e-sud-o-ziyan paida karen

apna e’ajaz-e-tasavvur dekhne ki chiiz hai

ham jo chahen to makan men la-makan paida karen

vaqt ko zid hi badal do rasm-e-arz-e-mudda.a

dil ye kahta hai ki hangama kahan paida karen

aap ki marzi ka hai paband-e-rang-e-gulistan

aap chahen to bahar-e-javedan paida karen

ruuh par haavi na ho jaa.e faza-e-sogvar

ham gham-e-dil se nishat-e-javedan paida karen

koshish-e-tamir ki taḳhrib-saman.i na puchh

ashiyan-bardar shaḳhen bijliyan paida karen

haan sikha den rang-e-ruḳh ko a.ina-dari ka fan

bahr-e-arz-e-mudda.a ham tarjuman paida karen

phir bulata tuun ke ye tevar kahan baaqi ‘uruj’

hal-e-dil kah kar javab-e-darmiyan paida karen