khel tha apni ana ka ishq use samjha kiya
main ne apne aap se kitna baḌa dhoka kiya
umr-bhar ka ham-nafas ik pal men ruḳhsat ho gaya
aur main ḳhamosh use jaate hue dekha kiya
ik zara si baat par ruTha raha vo der tak
muskura ke ḳhud hi phir meri taraf chehra kiya
fikr ki lazzat ke baa.is hain miri nakamiyan
sab amal karte rahe aur main faqat socha kiya
zaḳhm ki ik aag thi jis se suḳhan raushan rakha
dard ki ik lahar thi main ne jise naghma kiya
sab hi kuchh us se na kahna tha jo tere dil men tha
shiddat-e-iz.har men tu ne ‘farasat’ kya kiya
Leave a Reply