Ehsas Ke Sukhe Patte Bhi Armanon Ki Chingari Bhi

Aazim Kohli

ehsas ke sukhe patte bhi armanon ki chingari bhi

ik dil siine men tuuta sa aur fitrat men dildari bhi

mast umangon ke jhonke aur faaqa masti ka aalam

hasrat ki tez havaen bhi ummid ki atish-bari bhi

dil par khole udne ke liye udne ka magar imkan kahan

roken pairon ki zanjiren pinjre ki char-divari bhi

dekha na tujhe ai rab ham ne haan duniya teri dekhi hai

sadkon par bhuke bachche bhi kothe par abla naari bhi

behal na ho yuun nadan dil har haal men jiina hai lazim

hai raste men asani bhi majburi bhi dushvari bhi

ik khel musalsal gardish ka dekha hai ham ne gulshan men

phulon ka khil kar murjhana aur kaliyon ki kilkari bhi

manzil pe na pahuncha jab koi ilzam usi par kyuun aae

rah-rav ke bhatakne men hai kuchh rahbar ki zimme-dari bhi

‘azim’ teri barbadi men sab ne mil-jul kar kaam kiya

kuchh khel lakiron ka bhi hai kuchh vaqt ki kar-guzari bhi