Muneer Niyazi
mere jism men zahr hai tera
mera dil hai tera ghar
tu maujud hai saath hamesha
khauf sa ban kar sham-o-sahar
tera asar hai mere lahu par
jaise chand samundar par
itni zard hai rangat teri
jam jaati hai us pe nazar
tu hai saza mire hone ki
ya hai mera zad-e-safar
karega tu bimar mujhe ya
banega na-malum ka dar
rahega daaim gahri tah men
jaise andhere men koi dar
gum kar dega raah men mujh ko
ya dega manzil ki khabar
tu hai mera dost ki dushman
ye to bata mujh ko ai zar
Leave a Reply