duur saaya sa hai kya phulon men
chhupti phirti hai saba phulon men
itni ḳhushbu thi ki sar dukhne laga
mujh se baiTha na gaya phulon men
chand bhi aa gaya shaḳhon ke qarib
ye naya phuul khila phulon men
chand mera hai sitaron se alag
phuul mera hai juda phulon men
chandni chhoḌ ga.i thi ḳhushbu
dhuup ne rang bhara phulon men
titliyan qumriyan sab uḌ bhi ga.iin
main to soya hi raha phulon men
ruk gaya haath tira kyuun ‘basir’
koi kanTa to na tha phulon men
Leave a Reply