Poet
ziist ko qismat se kaam dekhiye kab tak rahe
chhalka hua dil ka jaam dekhiye kab tak rahe
kanpte honTon pe hai baat abhi uljhi hui
qissa-e-gham na-tamam dekhiye kab tak rahe
nabz bhi chalti hui dil bhi dhaḌakta hua
arzu-e-sub.h-o-sham dekhiye kab tak rahe
jazb-e-vafa na-tamam zauq-e-vafa be-sabat
lab pe mohabbat ka naam dekhiye kab tak rahe
ab to hai badli hui saqiya teri nazar
rind ke hathon men jaam dekhiye kab tak rahe
rah-e-talab se miri ḳhud to zamana hai duur
mujh se zamane ko kaam dekhiye kab tak rahe
saans ki raftar se hasraten baḌhti hui
qafila ye tez-gam dekhiye kab tak rahe
teri tajalli to hai dair-o-haram se juda
hasrat-e-dil na-tamam dekhiye kab tak rahe
arz-o-tamanna men hai rabt-o-asar bahami
‘fazl’ hamen un se kaam dekhiye kab tak rahe
Leave a Reply