poet

Dur Aur Pas Ke Satae Hain

duur aur paas ke satae hain

ham ne hijrat ke dukh uthae hain

jaane kis paar ja ke utrenge

khvab ke jo bhi dar banae hain

apni mitti se duur ho kar hi

hijr ke dukh samajh men aae hain

un ke aane se gulsitanon ne

khushbuon ke kanval khilae hain

manzilon ko pata nahin ham ne

raston ke fareb khaae hain

kisi pahlu qarar aaya nahin

dil ne qisse bahut sunae hain

ham ko ‘ashiq’ khabar nahin us ki

tiir apnon ne kab chalae hain

More Poems

Leave a Comment