Poet
ḳhubi-e-tarz-e-maqalat se kya hota hai
baat karte rahe ham baat se kya hota hai
raat kaT jaa.e to phir raat chali aa.egi
raat kaT ja.egi ik raat se kya hota hai
kisi janib se javab aa.e to kuchh baat chale
kavish-e-husn-e-savalat se kya hota hai
jab ki taqtir-e-rag-e-jan se bandhi hai taqdir
be-ḳhabar zikr-o-munajat se kya hota hai
daan diije ki mire gham ka mudava hove
ranj hota hai hisabat se kya hota hai
dil ki vus.at se hai asani-e-anfas vale
vus.at-e-sahn-e-mahallat se kya hota hai
samne aao kisi roz to kuchh baat karen
umr-bhar hall-e-muammat se kya hota hai
zaat hi maz.har-e-me.ar-e-haq-o-batil hai
vo ghalat kahte hain ki zaat se kya hota hai
jaan nikal ja.egi to faisla denge che ḳhuub
sahibo aisi mukafat se kya hota hai
Leave a Reply