Sochte Aur Jagte Sanson Ka Ek Dariya Hun Main

Athar Nafees

sochte aur jagte sanson ka ik dariya huun main

apne gum-gashta kinaron ke liye bahta huun main

besh-qimat huun miri qimat laga sakta hai kaun

tere kuche men bikun to phir bahut sasta huun main

ḳhvab jo dekhe the main ne vo bhi ab dhundla ga.e

ab to tum aa jaao sahab ab bahut tanha huun main

jal gaya saara badan in mausamon ki aag men

ek mausam ruuh hai jis men ki ab zinda huun main

mere honTon ka tabassum de gaya dhoka tujhe

tu ne mujh ko baagh jaana dekh le sahra huun main

main to yaaro aap apni jaan ka dushman hua

zahr ban ke aap apni ruuh men utra huun main

dekhne meri pazira.i ko ab aata hai kaun

lamha bhar ko vaqt ki dahliz par aaya huun main

tu ne be-dekhe guzar kar mujh ko patthar kar diya

tu palaT kar dekh le to aaj bhi hiira huun main

lafz gunge hain inhen goya.i dene ke liye

zindagi ke sachche lamhon men ghazal kahta huun main